قورشون آتیب بیشه دَن

بیزی چَکیب ریشه دَن

آرامیزا روزگار

دووار چکیب شیشه دن

 باغ یاغیشدان دولاندا

بُستان،یارپاق سولاندا

چتین اولماز اوغرولوق

ایستکلی گؤزل یوردوم،قزوینه سلام اولسون !

من فرهادام اوشیرین،شیرینه سلام اولسون

قزوینه سلام اولسون

تاکستانا،الونده،آبیکه وتاکنده

هرکوچه یَه،هرکنده،

هردینه سلام اولسون

قزوینه سلام اولسون!

اوغلان،کیشی آروادا

هرکیمسه یَه،هرزادا

گؤزیوردو ضیابادا

کاسیبلرینه،پوللو،مسکینه سلام اولسون

قزوینه سلام اولسون!

جنت دی قاقازانی

داغ- داشلاری،هریانی

دشتابی،بوئین زهرا

خوشحال آداما،یورغون، غمگینه سلام اولسون

قزوینه سلام اولسون!

باقلاواسی لاپ شیرین

پسته سی دَه  اعلادیر

لندن دی باراجینی

خیامی اروپادیر

هربیرخیابانینداوار پینه سلام اولسون !

قزوینه سلام اولسون

قزوینه سلام اولسون!

نه گؤیچک دیر بیزیم قزوین ماحالی !

قیزاوغلانی ،قوجا حاجی کمالی !

کسیردُکّانچی سی خلقین قولاغین!

ساتیر اون مین برابر پرتقالی !

گؤیرچینی تاپیلماز هئچ ماحالدا!

گؤرونمَزدونیادا قوردی ،شغالی !

اولوب مشهور ِ دونیا «سنگ پا»سی !

اونامایل اولوب تهران مارالی !

اؤجور کی ایسته ییر شیرینی فرهاد

سئوه ر «حاجی صفر»«حاجی جمالی »!

دئییردی «کالیفرنیا»دا بیرکس

سالیبلار چو: سئوه ر قزوینلی دالی !

یوخو جرات بیری یئردَن گوتورسون

اگر دوشسَه یئره بیر بش ریالی !

دئیر بازاردا هی حمّالا حمّال:

«مواظب باش منه دالدان نمالی »!

دانیشدی بیرنفرقزوینلی بیر گون

گؤزل یولداشینا :«ای شخص ِ عالی !

اگرقزوینه گلسون اتّفاقی

دالینجا دوشسَه بیر قزوین بابالی

اگر کی کوچه ی بن بسته دوشدون

چیخار یول اولمادی ترک ائت خیالی

یئره قوی اللرین لذ ّت آپارسن !

توکل ائیله بر حیّ تعالی !

پارچا گئتردی بیچمه !

ائوینه گئتد ین سیچمه

پاخیلین کوزه سیندن

سوسوز اؤلدون سوایچمه !

 گؤیدن یاغان یاغیش دیر

پاییزین آردی قیش دیر

قیزلاراگؤزایلمه

آی قوجابوپیس ایش دیر!

-------------------------------

گؤیدن یاغان یاغیشدیر

پاییزین آردی قیشدیر

قیزلارا گؤز ائیله مه
آی قوجا پیس ایشدیر!

-----------------------------------

لاپ محو ائدر طاقتی

اصلا یوخدور حکمتی

نیفرت آغیر بیر یوک دور

داشیمایین نیفرتی

----------------------

لک لکی لک لک دۏغار
میخکی  میخک دۏغار
 کیشی  کی  ائششک اولسا
آروادی ائششک دۏغار

------------------------

لیمانا گمی گلدی

غصه،ماتمی گلدی

یار گوله گوله گئتدی

گئتمه میش غمی گلدی

 ----------------------------

مریضین ویزیت اولماز
یانلیشین ائدیت اولماز
گؤزله گوناه ائیله مه
گوناهین دیلیت اولماز

---------------------------

منیم عاشیغام پنیره

چوره کچی یه،دبیره

عشقین خمیرکیمین دیر

باتوب الیم خمیره!!

-----------------------

میللتی سالیب دَردَه
اؤلکه یَه چکیب نردَه
دولت میللته دَردی،
گؤستَریر پَرده پَرده

----------

نه ساچین وار نه گؤزون
نه قوجاغین،نه سؤزون
غملر توتوب کؤنلومو
گئجه مى ساریب حوزون

---------------------------------

هئچ کیمَه حریف اولماز

هئچ زادی ردیف اولماز

کیشی الی بوش اولسا

خوار اولار شریف اولماز

-----------------------------

هانی شیرین صؤحبتین
سؤزلرین،محبّتین؟
گئجه نی گؤنش سیلر
منی سنین حسرتین

-----------------------

هر کئچی ارکک اولماز

پرتقال گرمک اولماز 

ساققال چوخالسا اوغلوم

یون اولار،پشمک اولماز

-------------------

یاسدیغی یوخ دایانسین

پالازی یوخ اوزانسین

آج آدامی سایمازلار

سوخسوللوق ائوین یانسین

-------------------------

یاش گؤزلریم قارالیر

تئللریمی قار آلیر

آرواد-اوشاق یانیندا

هر گون اوزوم قارالیر

------------------

یالانچی‌دا دین اولماز

ات آجی شیرین اولماز

آتا- بابا دئییب‌لر

داش اوسته اکین اولماز

-------------------

یاناغلارین لاله سی
گؤزلرین پیاله سی
منی سالیب چؤللره
ساچلارین شلاله سی

کیشی  ایشدن یورولماز
پاییزده یارپاق سولماز

یوک داشیماق راحت دیر
دردی داشیماق اولماز

کار بو سۆزو ائشیتمَز

بو دّرین سۆزوم ایتمز

عقل ایله شرعین سویو

هئچ واخت بیر آرخا گئمز

عومور بیر خوش باخیش دیر

بیر بولود،بیر یاغیش دیر

دئدین فلاکت نه دیر ؟

ایراندا یاشاییش دیر 

عزیزیم یالان یاخشی

ملتی تالان یاخشی! 

خالق اوستونه قویماغا
کتاندان پالان یاخشی